युवाहरूको नेतृत्व विकास तथा सामाजिक रूपान्तरणमा अग्रणी संस्था नेपाल जेसीज ले “प्रोजेक्ट संकल्प २०२६” लाई सफल, सबल र प्रभावकारी बनाउने उद्देश्यसहित दुई दिने राष्ट्रिय मनोनित पदाधिकारीहरुको कार्यशाला गोष्ठी तथा भेटघाट कार्यक्रम सम्पन्न गरेको छ।
काठमाडौंस्थित यलो प्यागोडा होटल मा शुक्रबार र शनिबार बालाजु जेसीजको आतिथ्यतामा सम्पन्न उक्त कार्यक्रममा वर्ष २०२६ का लागि मनोनित राष्ट्रिय पदाधिकारीहरूको उल्लेखनीय सहभागिता रहेको थियो। कार्यक्रम “एकताको संकल्प, रूपान्तरणको यात्रा” भन्ने मूल नाराका साथ सम्पन्न भएको हो, जसले संगठनको आगामी दिशालाई स्पष्ट रूपमा चित्रण गरेको छ।
कार्यक्रमको उद्घाटन सत्र जेसी जीवन कार्की को अध्यक्षतामा सम्पन्न भएको थियो। उपस्थित सहभागिहरुलाई बालाजु जेसीज वर्ष २०२६ का अध्यक्ष जेसी नारायण शर्माले स्वागत मन्त्वयबाट स्वागत गर्नु भएको थियो भने प्रमुख अतिथिका रूपमा लगानी बोर्ड नेपाल का प्रमुख कार्यकारी अधिकृत सुशील ज्ञवाली को उपस्थिति रहेको थियो। आफ्नो मन्तव्यमा ज्ञवालीले युवाहरूको सशक्त संस्था जेसीजसँग सहकार्य गर्दै राष्ट्र निर्माणका विविध क्षेत्रमा काम गर्न आफूहरू तयार रहेको धारणा व्यक्त गरे।
कार्यक्रममा करिब १५० जनाको सहभागिता रहेको थियो। यसमा राजेन्द्रराम श्रेष्ठ, फुलकुमार लालवानी, रविन पोखरेल लगायत पूर्व राष्ट्रिय अध्यक्षहरू तथा जेसीआई नेपाल फाउन्डेसन का अध्यक्ष विष्णु बराल को विशेष उपस्थिति तथा सहजीकरण रहेको थियो।
कार्यशालामा मनोनित पदाधिकारीहरूको भूमिका, जिम्मेवारी, अधिकार तथा वर्षभरि सञ्चालन गरिने कार्यक्रमहरूका विषयमा विस्तृत जानकारी प्रदान गरिएको थियो। साथै “Aim, Act, Achieve” प्रकरण अन्तर्गत लक्ष्य निर्धारण, कार्यान्वयन रणनीति र उपलब्धि हासिल गर्ने विषयमा गहन छलफल तथा समूहगत प्रस्तुतीकरण गरिएको थियो।